វៀតណាម៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានមកដល់រដ្ឋធានីហាណូយ ​ប្រទេសវៀតណាមដោយសុវត្ថិភាពហើយនាព្រឹកថ្ងៃទី២០ ខែមិថុនានេះ ដើម្បីជួបពិភាក្សាជាមួយមេដឹកនាំប្រទេសតំបន់អាស៊ីអាគ្នេយ៍មួយនេះ បន្ទាប់ពីបានបញ្ចប់ដំណើរទស្សនកិច្ចដ៏កក្រើក និងគួរឱ្យចាបអារម្មណ៍នៅលើទឹកដីកូរ៉េខាងជើង។ 

បើតាមប្រភពពីសារព័ត៌មាន Reuter បានរាយការណ៍ថា យន្តហោះពិសេសរបស់ប្រធានាធិបតីរុស្សីបានចុះចតនៅក្នុងអាកាសយានដ្ឋានអន្តរជាតិរដ្ឋធានីហាណូយ ដោយមានការទទួលស្វាគមន៍បដិសណ្ឋារកិច្ចលើកម្រាលព្រំក្រហមពីសំណាក់លោក ត្រាន់ ហុងហា (Tran Hong Ha) សមាជិកបក្សកុម្មុយនីសវៀតណាម និងឧបនាយករដ្ឋមន្រ្តី ទទួលបន្ទុកសេដ្ឋកិច្ច។

នៅ​ក្នុង​ការ​អត្ថាធិប្បាយ​ដែល​បាន​ចុះ​ផ្សាយ​ក្នុង​កាសែត​បក្ស​កុម្មុយនិស្ត​វៀតណាមបញ្ជាក់ថា ​ដំណើរ​ទស្សនកិច្ច​របស់​លោក លោក ពូទីន បាន​សាទរ​ដល់​វៀតណាមសម្រាប់​ការ​គាំទ្រ "វិធី​សាស្រ្តជាក់ស្តែង​ដើម្បី​ដោះស្រាយ​វិបត្តិនៅអ៊ុយក្រែន"។ គួរបញ្ជាក់ថា វៀតណាមដែលអនុវត្តគោលនយោបាយការបរទេសអព្យាក្រឹតជាផ្លូវការដែលខ្លួនហៅថា "ការទូតដើមឫស្សី" ឬ "Bamboo Diplomacy" ក្នុងទំនាក់ទំនងជាមួយមហាអំណាចពិភពលោក ដែលជាក់ស្ដែងវៀតណាមបានបដិសេធលើការថ្កោលទោសការវាយប្រហាររបស់រុស្ស៊ីទៅលើអ៊ុយក្រែន ដែលទង្វើនេះត្រូវបានបណ្តាប្រទេសលោកខាងលិចចាត់ទុកថាហាក់ដូចជាមានភាពលម្អៀងទៅលើរុស្សីពេក។ 

វៀតណាមនឹងក្លាយជាប្រទេសទី៣ នៅក្នុងទ្វីបអាស៊ីដែលជាគោលដៅនៃទស្សនកិច្ចរបស់លោក  វ្ល៉ាឌីមៀ ពូទីន បន្ទាប់ពីចិន និងកូរ៉េខាងជើង ចាប់តាំងពីលោកបានស្បថចូលកាន់តំណែងជាប្រធានាធិបតីអាណត្តិទី៥ របស់រុស្សីកាលពីខែឧសភា ឆ្នាំ២០២៤ នេះ។ ដោយឡែក វៀតណាមក៏បានត្រៀមលក្ខណៈសម្រាប់ការស្វាគមន៍យ៉ាងពេញលេញចំពោះដំណើរទស្សនកិច្ចនៃមេដឹកនាំរុស្សីរូបនេះ ដែលជាដំណើរទស្សនកិច្ចលើកដំបូងរបស់លោកចាប់តាំងពីឆ្នាំ ២០១៧ និងជាទស្សនកិច្ចលើកទី៥ របស់លោកនៅលើទឹកដីវៀតណាម។ 

ជាមួយនឹងការរំពឹងទុកថានឹងមានជំនួបជាមួយមេដឹកនាំកំពូលៗរបស់វៀតណាម លោក ពូទីន ក៏នឹងមានការចូលរួមដាក់កម្រងផ្កាគោរពវិញ្ញាណក្ខ័ន្ធរបស់វីរបុរសវៀតណាម លោក ហូ ជីមិញ ផងដែរ៕